معزة ومقدار الصمت له عندى مكان
في زحمة الافواه .. يا مزين الصمت !!
لا صار بعض البوح عند البشر عار
لو يشتعل جوفي حشى ما تكلّمت
تعبت من قولة : (علامك) و وش صار ؟
وأن طحت ما ألقى سوى كلمة (سلمت)
واعذار اخلقها ولو مالي اعذار
مشّيتها مره .. ومرات ما رمت !!
كذبة صباح الخير/ يا صبح الانوار
عذري ليا عدّت ليالي ولا نمت
اسهر طوال الليل وضْيوفي أفكار
واقول لاْصحابي : نعم توّني قمت !!
ما عاد فيني ألفت عْيون واْنظار
يكفي بأني من زماني تعلّمت
أن الصدر بيتــ ٍ.. وسكّانه أسرار
نيّام .. بس يصحون لامن تألّمت
يصحون ويناظرهم الجار والمار
وش عاد ينفع سترهم لو تكتّمت ؟!!
آقدّم اقدامي على درب الاصرار
امشي ولكن للأسف ما تقدّمت
النار قدامي .. ومن خلفي النار !!
والعمر يمضي بي وأنا ما تولّمت
الين ذاك الحلم في لحظه انهار
وأنا مع لحظة سقوطه تحطّمت
جروحي كثار..وتناهيدي كثار
لكن على كثر المواجع .. تبسّمت !!
ثم أْلتزمت الصمت وعزومي اكبار
ولو يشتعل جوفي حشى ما تكلّمت
ليست هناك تعليقات:
إرسال تعليق